في حد ................................تعرفه من هو

تعرف ان في حد بيحبك قوي حب لنفسك مش لمالك اولشئ تاني .
في حد بيسامحك مهما غلط فيه او اسأت اليه وجرحته بايدك.
في حد بيحميك من كل شر وبيخاف عليك ويحوط عليك بايديه المجروحه و بكل قوته ولاخر نفس في حياته.
في حد باع نفسه بارخص ثمن ب 30 من الفضه علشان يشتريك باغلي ثمن عنده دمه الكريم الخالي من اي دنس او فساد وبروحه الطاهره المقدسه.
في حد بتحمل ألمات علشان خايف عليك وبيبنيلك بيت جنبه في ملكوت السموات علشان تبقي قريب منه ومش عايز يغمض عينيه من عليك.
في حد بيتحمل اهانه و شتيمه وبثق في وجه علشان متوقعش في الغلط .
في حد ما بينمش الليل ولا النهار علشان يحرسك من شيطان الظهيره او من اي امر يسلك في الليل خوف عليك.
في حد مهما ما تبعد عنه بيبقي مستنيك ومهما اتاخرت عليه برضه ما بيفقدش الامل في انك تروحله او تذوره في بيته.
في حد مهما بتوعده انك ها تتكلم معاه و ما بتوفيش بوعدك ليه يبقي برضه متشوق انك تكلمه ولو خمس دقايق في اليوم بس تفتكره في وسط مشاغلك.
في حد بيخفف عليك همك لما تكون تعبان ومفيش حد جنبك غيره هواللي بيقولك (تعالوا اللي ياجميع المتعبين و حاملي الاثقال وها انا اريحكم) .
في حد بيفكر فيك طول الوقت و ما بتغبش عن باله او عينيه لحظه.
في حد بيرشدك وينصحك للطريق الصح ومش عايز ليك غير كل خير وسلام.
في حد مهما بتسببله جروح برضه هو اللي وقت ما بتزعل او تنزل دمعه من عينيك هو اللي بيمدلك ايديه علشان يمسحلك دمعك ويحولها لفرح وسعاده.
في حد هو فيك وانت فيه انت حامل اسمه لانك ابنه لدرج انك بتاكل منه و بتشرب دمه دا انت كمان شايل جواك هيكله المقدس و روحه المقدسه.
في حد هو معاك طول الوقت بيكلمك وينورلك عينيك وانت فين وفين لما تفتكره بس لما توقع في مشكله ومش عارف تحلها او تتعب او تمرض بس هو مش زعلان منك رغم كدا.
في حد معاك وقت المك بيحزن وبيعمل كل شيئ علشان يفرحك ووقت فرحك بتنساه وكأنه مش هو اللي زال عنك الالم والتعب وشفاك من مرضك.
في حد لما اتألم كل الناس بعده عنه حتي اقرب الناس ليه واللي كان معاهم علي الحلوه والمره وبيتحمل ألماتهم ولما جه الوقت اللي احتاجهم فيه الكل بعد عنه ونكره ولا كأنه يعرفه اساسا.
في حد بنام الليل وبينسي يشكره انه خلي اليوم يعدي بسلام بسببه و بتدخل منه وانه مدينا السلام في حياتنا كلها وفي الوقت نفسه عينيه علينا وبيوصي ملائكته انها تحوط علينا طول حياتنا .
في حد بيضحي برحته علشنا وبنجري وره حد تاني وبنزعل اللي بيضحي علشنا وبنفرح اللي بيضحي بينا .
في حد مستني منك انك تكلمه في اي وقت مهما كان صبح او ليل ولما تجيله تلاقيه فاتح حضنه ليك ومدد لك ايديه وتلاقي في حضنه الراحه والامان والاطمئنان.
في حد بايدينا دقينا المسامير في ايديه ورجليه وطعناه في جنبه وهو اللي بايديه بيشفينا ويطيب جروحنا.

Written by syl